داليا سعد الدين تكتب لمجلة أخبار مصر
فرعون الخروج
دى
صورة مومياء الملك (رمسيس التانى) اللى حكم الإمبراطورية المصرية خلال
الفترة التقريبية (1279 - 1212 ق.م "قبل الميلاد يعنى") وقائد معركة (قادش
– 1274 ق.م).
 |
| رمسيس الثانى |
صورة مومياء (رمسيس التانى) منتشرة عالفيس بوك باعتبارها
صورة (فرعون الخروج) أو (فرعون موسى) بقالها فترة طويلة – وزادت اليومين
دول – وقال إيه ياخويا إن (العلم – وخالوا بالكم من العلم هنا) أثبت إنها
مومياء أو جثة (فرعون موسى)، قال إيه (عشان فى المومياء نسبة ملح).
طيب طالما علم بقى فنتكلم بالعلم.
مبدئيًا كده ومن غير لت وعجن، ماعندناش حاجة أصلا في التاريخ المصرى
القديم اسمها – ولامؤخذة – (فرعون)، لأن الكلمة دى أصلها توراتي، واللي بيستخدموها لمجرد إنهم يبيعوا، ده حتى علميًا اسمه (علم المصريات) مش (علم
الفرعونيات)، مش نشغل دمغنا شوية؟
وكمان كلمة (فرعون) مش موجودة أصلا
في اللغة المصرية القديمة بخطوطها التلاتة (الهيروغليفية، والديموطيقية
والهيراطيقية)- والخطوط التلاتة دول زى خطوط النسخ والرقعة وغيهم من الخطوط
في اللغة العربية - المهم إن كلمة (فرعون) دي أصلا قد تكون متحرفة عن
التعبير المصرى القديم (بر عا) واللي معناه الحرفي هو (البيت العالي أو بيت
الحكم) زى مابنقول دلوقتى مثلا (قصر الاتحادية) هو ده معناه إن (قصر
الاتحادية) هو اسم رئيس مصر؟ أما عن تحريف التعبير القديم من (بر-عا) إلى
(فر-عا أو فر-عو أو فرعون) فدى حاجة طبيعية فى لغات الشعوب المتجاورة.
أما المومياء أو الجثة فيها نسبة ملح عالية، طبعًا يا أبو العُريف، لأن أجدادنا القدماء كانوا بيحنطوا جثث الملوك، وبعض الشخصيات ذات النفوذ
والمال، باستخدام كميات كبيرة جدا من الملح، والعملية كانت بتستمر لمدة من
35 إلى 40 يوم، قد تزيد وقد تقل، وافتكر إن أي حد عنده شوية معرفة وبعض
العقل هيعرف ليه المصريين لحد النهارده بيحيوا ذكرى الأربعين.
(رمسيس
التاني) مات بأمراض الشيخوخة ده غير إنه كان عنده روماتزم حاد فى المفاصل.
واحد عنده أمراض شيخوخة وروماتزم في المفاصل، هيطلع يجرى بالعجلة الحربية
بتاعته درجن درجن ... وأرى ناس سرقوا دهب وأموال المصريين؟ - آه عشان اللي عايز
يكفر ويقولى إني بقول عليهم سرقوا، ياريت سعادتك تراجع سفر الخروج،
الإصحاح 3، الآية 22 (بل تطلب كل امراة من جارتها ومن نزيلة بيتها أمتعة
فضة وأمتعة ذهب وثيابا وتضعونها على بنيكم وبناتكم. فتسلبون المصريين). وبالمناسبة انا بقى واحده عايزة دهب وفضة (ستى / جدتى يعنى) وبفويدها من
ساعة ماتسرقت لحد دلوقتى، مش بتقولوا إن اللى حصل ده مثبت علميًا
وتاريخيًا؟
خلصنا من موضوع (رمسيس التاني)، فيه ناس تانية بقى قالولك: (لا، ده الفرعون اللي رباه واحد، والفرعون اللي اضطهد اليهود
واحد تاني خالص)، فحبوا يلبسوها في مين، في ابن (رمسيس التانى) الملك
(مرنبتاح)، وقالوا دليلهم (العلمي) إنه ذكر في لوحة في معبده الجنائزى إنه:
(اجتذت بذرة العابيرو)، وناس تانية قالك: (لا، ده اتذكر اسم إسرائيل لفظَا
فى اللوحة)، وماله!
(مرنبتاح) يا سادة حكم وهو في أواخر الستين أو
أوائل السبعين، وحكم مصر حوالى عشر سنين تقريبًا ( 1213 – 1203 ق.م)،
واللوحة بتقول إنه فى السنة الرابعة من حكمه طلع لتأديب القبائل اللي في الشمال الشرقي لمصر، وفي السنة الخامسة من حكمه طلع لتأديب القبائل في (لوبيا / ليبيا حاليا) في الغرب.
ولو افترضنا جدلا إن (مرنبتاح) هو ذات
نفسه (فرعون موسى) فده معناه إنه مات فى السنة الرابعة من حكمه، ويرجع
(حىّ) من تاني عشان يحارب القبائل الليبية في الغرب في السنة الخامسة من
حكمه، ما هو طبعا مش قدماء المصريين (فراعنه بقى).
ناس تانية بقى، ودول اللي عايزين يثبتوا إن (بني إسرائيل أو اليهود) كانوا
في مصر من أيام الدولة القديمة وليهم يد في بناء الأهرامات، وإن المصريين –
ياحرام – اضطهدوهم وعذبوهم، قبل ما يجي الهكسوس وينقذوهم، لبسوا (فرعون
موسى) فى مين بقى؟ لبسوا (الفرعون) ده في(إحموس الأول) مؤسس الأسرة
الـ 18، بداية الدولة الحديثة، بس ماعندهمش أدلة غير البُقين اللي قولناهم
فوق دول، وإن (بني إسرائيل) عشان كانوا بيتعملوا وبيساعدوا (الهكسوس) فقام
(إحموس الأول) غضب عليهم واضطهدهم وطاردهم خارج الحدود، برضك وماله!
(إحموس الأول) بدأ حكمه بحروب، كان أهمها حربه ضد الهكسوس وطردهم خارج
البلاد، وحكمه كان تقريبَا خلال الفترة ( 1550 – 1525 ق.م) يعنى حكم 25 سنة
تقريبًا سعادتك، مش قولنا إنهم (فراعنة) يعنى عادي جدا إن (إحموس الأول)
مات من سنة 1580 ق.م – سنة حصار الهكسوس في حصن (شاروهين) – لحد سنة 1550
ق.م ورجع في السنة دى (حىّ) من تانى عشان يأسس الأسرة الـ 18.
هيا مش الرياضيات دى علم؟ وفيها معادلات رياضية بسيطة زاى كده :
1+1=2
يعنى فيه عندنا طرفي معادلة حسابية، ناتج العملية الحسابية لطرف المعادلة الأول، هو الطرف التانى للمعادلة، مش كده؟
طب ماتيجوا نعمل تعديل بسيط فى المعادلة دى
فبدل مانقول (1 + 1 = 2) نقول (موسى + وجود اليهود فى مصر = فرعون موسى)
وعلى كده فاحنا محتاجين إثبات وجود (موسى) أساسًا وثائقيًا وبالتالى زمنيًا وتاريخيًا، صعب مش كده؟؟؟
بلاش ده
محتاجين إثبات وجود (بني إسرائيل) وثائقيًا في أى زمن من أزمان الدولة
القديمة، أو الدولة الوسطى، أو الدولة الحديثة، مافيش حاجة غير لوحة
مرنبتاح، واللي احتمال يكون المقصود (بالعبيروا) فيها (العبرانيين أو بنى
إسرائيل)، واللي اتقال فيها إن (مرنبتاح) حاربهم خارج الحدود المصرية
أصلا، مش داخل حدود مصر؟
بقى كده طرفي المعادلة الأولانيين مجهولين، يعنى الطرف التالت في المعادلة وهو (الناتج) بالتالي مجهول.